FC廣州撳住搶 獵鹿大陣仗

猪拉多纳

獵鹿「大」行動今晚上演！廣州恒大淘寶（足智彩譯FC廣州）今晚响天河主場迎戰日職傳統勁旅鹿島鹿角，爭取亞冠盃H組3連勝，呢場波恒大瓣瓣佔上風贏出唔難，就怕後防唔穩有失波，所以博1.65倍入球大，點都穩陣過2.1倍「主主」。

（now 671台周三晚8:00直播）
射手高拉特狀態Fit

恒大除咗喺中超盃互射12碼輸畀山東魯能，開季中超聯賽、亞冠盃4戰全部Win出，雖然場場都係僅熟，但係巴西新兵列卡度高拉特fit到漏油，4戰入6球，整體攻擊力畀內地傳媒讚係勁過上季。但係大家唔好忽略一樣嘢，就係恒大近期雙線作戰傷兵成籮，除咗巴援中場阿倫杜格拉斯、門將曾誠同後衞張琳芃，上場聯賽作客重慶，中場黃博文撞穿頭縫咗4針，後衞鄒正、劉建、李帥甚至前鋒郜林都有唔同程度嘅傷患，主帥簡拿華路呢期相當頭痕。
鹿島4連敗擁躉狂插

好彩嘅係，對手鹿島鹿角開季4連負衰到貼地，呢隊波人腳配搭唔算曳，衰就衰在今季計錯數，佢哋本來度好咗打單箭頭陣式，點知上季省入10粒嘅達維重傷休戰到6月，諗住由巴西增兵又傾唔掂數，結果冇狗拉隻貓，羅致咗响葡甲打滾嘅前國腳金崎夢生頂檔。但係打邊爐同打屎忽個分別就好大嘞，搞到鹿島季初4戰只入3球，加埋新進國腳守衞昌子源又有傷，表現有乜法子會好先，上場聯賽輸畀湘南之後，班鹿島躉就狂插班球員係「給料泥棒」（薪金小偷），真係乜面都冇晒。

由於恒大素來打日本球隊都比較有把握，今場波佢哋贏面高一線，而且有主場之利，呢隊「華南虎」一定開波就撳住搶，開出「主主」嘅機會唔細，只不過佢哋個後防呢期畀唔到人信心，完全搵唔到唔失波嘅保證，都係玩入球大着數啲。

亞冠盃H組