禾堡睇定食大茶飯

猪拉多纳

國米落後1比3焗攻

歐霸盃16強次回合，重頭戲係意甲國際米蘭主場迎戰大熱門德甲禾夫斯堡，國米近年戰鬥力大幅下滑，不過首回合落後1比3要焗攻，面對前線着晒火嘅禾夫斯堡會係對攻格局，既然禾堡冇必要再贏，今場寧捧大盤好過。

（有線61及201台周五凌晨4時05分直播）

禾夫斯堡首回合贏得清脆，令佢哋熱上加熱，奪標賠率由6倍急跌至4.5倍，事實上佢哋確係今年全歐洲其中一支最弗球隊，前線奇雲迪布尼同巴斯杜斯狀態銳不可當，配合舒賀爾尼、維爾連亞、卡利古尼同麥斯美艾洛特等速度同技術兼備嘅攻擊手，攻擊點多亦擅長打快速反擊，今仗面對空群而出嘅國米唔憂冇波入。不過考慮到禾堡已經兩球在手，球隊今季歐戰作客勝出率唔高，加上後防大將拿杜停賽，所以實力雖在國米之上，平手盤都唔考慮捧客軍。
國米前線孖寶有料

國際米蘭自名帥莫連奴於2010年幫佢哋攞咗三冠王後一沉不起，經歷七位教頭都無法重返高峰，如今搵番前度主帥文仙尼亦冇起色，喺意甲排第七，但落後第六嘅森多利亞已經八分，下屆再踢歐霸嘅機會都唔高，所以今場會珍惜機會搏盡。球隊最強一環係前線，莫路伊卡迪係今季意甲其中一位最閃耀鋒將，阿根廷射手柏拉斯奧已經連續三場正式賽事有波入，今晚放開懷抱博一鋪實去盡，但球隊攻守轉換太慢，難頂禾堡快速反擊，預期今仗入波唔會少。
Alwin 推介：

國際米蘭大：4★

西維爾大：3★

比錫達斯大：3★