MSN弗爆國家打吡完勝BBC

猪拉多纳

巴塞隆拿 Vs 皇家馬德里
周一凌晨4時開戰

西班牙國家打吡矚目爆發！氣勢如虹嘅「地上最強」巴塞隆拿，今輪聯賽喺主場火併死對頭皇家馬德里，合演次循環嘅國家打吡（EL CLASICO），由於榜首嘅巴塞只領先皇馬1分，呢場係名副其實嘅爭標「6分波」，挾着近18仗贏17場嘅強勢，加埋「MSN」火力全開，遠勝陷入低潮嘅皇馬「BBC」組合，巴塞有力贏波甩開對手，主W有買趁早。

（now 632周一凌晨4時直播）

踢波嘅嘢唔係齋睇實力，運勢都好重要，巴塞就有辦你睇，自2015年首仗不敵皇家蘇斯達後，喺各項比賽總共踢咗18場，竟然取得17勝1負嘅佳績，歐聯晉級8強同殺入西班牙盃決賽之餘，仲以1分反壓皇馬升上聯賽榜首。巴塞能夠強勢反彈，「MSN」美斯、蘇亞雷斯同尼馬絕對居功至偉，佢哋喺呢18仗合共轟入42粒，真係弗到勒唔住，當中喺各項賽事累積43球嘅王牌美斯，被踢爆聘用意大利營養師執過份餐單，兼且戒埋Pizza，令佢瘦咗8磅，重拾球王霸氣，難怪今季遇神殺神、遇佛殺佛喇。
美斯復甦 C朗運滯

今季皇馬曾締造22連勝弗到震，當時好多人都認為聯賽同歐聯錦標非佢哋莫屬，但成季流流長點都會有起伏，有時弗爆狀態來得太早亦非好事。以入波當食生菜嘅射手C朗為例，踏入2015年只入得9粒，係佢上「艦」後同期最差成績，腳風認真唔順，上輪對利雲特冇波入之餘，仲不堪被噓竟向球迷爆粗，腳風唔順兼咁情緒化勢必影響表現，佢同加里夫巴利又有心病，另一前鋒賓施馬亦狀態麻麻，「BBC」三叉戟近況遠遜「MSN」。巴塞依家只領先皇馬1分，首循環又輸畀「銀河艦隊」，若果之後同分要計對賽成績就勁輸蝕，所以今仗爭勝決心唔使懷疑，斯維「力推」巴塞主W，不妨吼埋大盤。