雙紅會撐曼聯

猪拉多纳

兩大天煞剋星搞住利物浦

利物浦同曼聯呢Pair死對頭每季至少碰頭兩次，但每次交手都充滿話題性；今季呢兩支英格蘭足球史上最偉大嘅球會冇得爭冠軍，齊齊淪落到要搶歐聯入場券，利物浦依家落後第四位曼聯兩分，今次主場出戰非勝不可，不過見錢開眼嘅「紅魔鬼」肯定唔會畀死敵爬頭，誓要保住優勢殺入歐聯呢個金礦，況且曼聯今場仲要有比利同球證呢兩大「福星」射住，受讓博得過！

（now 621周日晚9時30分直播）

迪基亞女友Edurne上個禮拜突然爆seed數臭曼徹斯特市污糟邋遢，講到明對男友効力嘅曼聯冇好感，不過前日又改口風話「I love Manchester!」（我愛曼市），究竟邊句真邊句假呀？以科娜早排去過曼市嘅經驗，可以肯定Edurne話鍾意曼市擺明吹水，因為曼市環境實在唔好，工業味濃兼冇特色景點，簡單一個字形容：悶！
魔星肉緊歐聯金礦

之但係點解仲有咁多球星好似迪馬利亞、戴利白蘭特、法卡奧肯嚟曼市，仲要加盟今季冇歐聯踢嘅曼聯？講白啲咪又係錢作怪，邊隊出起高人工咪去邊度囉！所以今場大戰關乎曼聯入唔入到歐聯金礦，仲要關乎自己嘅前途，可唔可以keep住攞高薪，唔洗講呢班咁現實嘅「魔兵」肯定會搏命頂住紅軍！

仲有更重要因素，咪話科娜迷信，紅魔今場坐擁兩大「福星」，想全身而退都易啲！首先係球證艾堅遜，呢位43歲判官已經執法過首循環嘅「雙紅會」，當時利物浦作客奧脫福慘吞三蛋；艾堅遜今季合共執法紅軍比賽三次，紅軍就三場都贏唔到，堅邪喎！
比利捧菲臘比古天奴場

不過咁都未算大鑊，因為最大鑊係紅軍今場有「烏鴉口」比利撐場，佢話專程嚟睇同胞菲臘比古天奴，「古仔」呢排弗到漏，係紅軍攻擊線最核心人物，依家畀比利咁樣「力撐」，紅軍今場要贏波真係要自求多福。其實紅軍呢排攻力真係有啲曳，靠晒佐敦軒達臣同「古仔」入波，「2S」史杜列治同史達寧未夠弗，面對神勇嘅迪基亞，要贏唔係咁易！