QPR失失慌捧拖肥第一隊入波

猪拉多纳

上仗聯賽作客輸畀水晶宮嘅昆士柏流浪（QPR），唔經唔覺已經錄得四連敗，深陷護級水深火熱之中。QPR今仗主場出擊面對啱啱喺歐霸盃慘敗嘅愛華頓，相信係搶分嘅大好良機，但呢班波近期成日都畀對手先開紀錄，一班球員比賽初段似乎唔係太集中精神，今仗隨時又畀「拖肥糖」先拔頭籌，阿謙推介愛華頓第一隊入球。

（now 622周一凌晨零時直播）
盧卡古托弗腳風順

QPR上場聯賽1比3輸畀水晶宮後錄得四連敗，球隊近八仗更輸咗七場，只係贏過啱啱換帥嘅新特蘭，護級形勢相當險峻。QPR主帥基斯藍斯雖然對球隊能成功護級仍抱有希望，但阿謙睇過幾次佢哋嘅賽事，覺得班波後防唔集中係最大問題，往往好易走甩對手最具威脅嘅球員而失波，呢個唔係話咁快就可以解決嘅問題，加上仍有後衞李察鄧尼、中場利萊費亞同艾真度科連因傷缺陣，今仗想贏波唔係話咁易。

愛華頓啱啱喺歐霸盃作客基輔戴拿模慘輸2比5，兩回合被對手反勝淘汰出局，可以話係打擊甚大。「拖肥糖」今季要應付聯賽及歐霸盃兩條戰線，球隊喺兵源緊絀下仍能捱到16強先出局，表現唔錯相信球迷都會收貨。愛華頓依家可以專心應付聯賽戰線，今仗作客QPR雖有中場巴利停賽，後衞白賴仁奧維度及希拔、中場派拿同米拿拉斯因傷踢唔到，但前鋒盧卡古近期頻頻入波，面對狀態平平近期經常先失波嘅QPR，阿謙睇好「拖肥糖」今仗可以先開紀錄，推介愛華頓第一隊入球。