法國 巴西hea踢獻細

猪拉多纳

98世盃翻版戰冇晒星味

今晚國際熱身賽重頭戲，就係98年世界盃決賽翻版戰，巴西作客重返當年慘吞3蛋嘅傷心地——巴黎法國球場硬撼法國。今時今日「森巴兵團」剩番尼馬孭到飛，其他球員絕非頂級，主隊法國連上緊位嘅超級新星保羅普巴都打柴，令場波星味大減，加上兩軍想藉「拍跳」試陣戰意難測，斯維寧捧入球細。

（周五凌晨4時開賽）

以往法國對親巴西，總鬥得非常燦爛，雙方經典球星如柏天尼、施丹、亨利、朗拿度、李華度及朗拿甸奴等，個個全屬「球王」級，當中98年世盃決賽「懸案」最為經典，如日方中嘅巴西前鋒朗拿度突患怪病夢遊球場，最終被有主場之利嘅法國以3球擊潰搶走冠軍，呢場波嘅猜測及爭議從未停止。
聯賽入直路唔緊太公波

今晚巴西重返呢個傷心地巴黎法國球場再鬥「高盧雞」，可惜矚目程度同當年差幾條街。「森巴兵團」近年除「新比利」尼馬個朵咁響外，其他如韋利安、奧斯卡杜斯山度士等難稱得上頂級，領隊鄧加衰到重召過晒氣嘅羅賓奴，連同兩名中堅大衞雷斯同馬昆奴斯哥利亞因傷退隊，真係睇見都唔開胃。

不過，下年歐國盃決賽周東道主法國亦唔好得幾多，被喻為「新韋拉」嘅保羅普巴上周歐聯對多蒙特打柴有排抖，冇咗呢位超級新星喺中場穿針引線，就算前線有基奧特同賓施馬都形同虛設，連同隊長兼門將洛里斯因傷落選，佢哋唔見得比巴西勁好多喎。況且歐洲各地聯賽已入直路，球員如果喺呢個時候出戰「太公波」受傷，對所屬球會影響極大，既然勝負無關痛癢，預計兩軍都係就住嚟踢唔慌搏，轉玩入球細好過。