日本-1贏面突出

猪拉多纳

新帥領軍誓響頭炮

國際足球熱身賽，日本於大分市主場迎戰非洲球隊突尼西亞，日本今場有新帥效應支持，夏利荷錫以往喺非洲執教科特迪瓦與阿爾及利亞時，對突尼西亞底細可謂暸如指掌，讓球主勝可放心捧場。

（有線61及201台周五晚6時30分直播）
夏利荷錫執教有保證

日本喺年初舉行嘅亞洲盃衞冕失敗八強出局，墨西哥領隊艾古爾執教短短半年冇得留低，由波斯尼亞籍教頭夏利荷錫接手。紅褲子出身嘅夏利荷錫曾經代表前南斯拉夫贏過U21歐國盃冠軍，轉任教練後喺法甲打出名堂，然後轉赴非洲先後帶領科特迪瓦及阿爾及利亞取得好成績，當中以去年夏天帶領阿爾及利亞喺世盃16強差啲擊敗德國最令人津津樂道，執教功力毋庸置疑。

夏利荷錫初來甫到，首次點兵保守中帶進取，本田圭佑、香川真司、岡崎慎司、長谷部誠等海外球員必然入選，土炮方面則棄用老將遠藤保仁，選入柴崎岳、武藤嘉紀、永井謙佑、宇佐美貴史等潛質新秀，實行以老帶新，為2018年世盃外圍賽作好準備。
突尼西亞缺主力射手

突尼西亞上年冇份參加巴西世界盃，喺今年一月初舉行嘅非洲國家盃亦喺八強被淘汰，成績冇咩突破，國家隊史上入波最多嘅王牌前鋒祖馬亞今次未有入選，想爭取入波更加困難，日本可望為夏利荷錫打響頭砲。