葡萄牙啱玩讓球和

猪拉多纳

C朗太火大 隨時炒燶塞

今晚歐國盃外圍賽I組葡萄牙主場火併塞爾維亞，葡國萬人迷C朗近日腳風唔順之餘，脾氣仲愈來愈暴躁，隨時影響表現冇貨交，況且主帥費蘭度山度士最擅踢「1比0」悶蛋足球，面對守得兩嘴嘅塞爾維亞頂盡贏一粒，讓球主客和葡軍讓一球，不妨冷吼3.1倍嘅讓球和。

(有線61及201台周一凌晨2時45分直播)

上年喺皇馬順風順水嘅C朗，嚟到2015年突然跌Watt，入球率明顯急降，上周喺西甲國家打吡作客巴塞雖有士哥，但卻一腳伸向對方馬斯真蘭奴下體後，再疑似走去扭佢耳仔，又發癲連自己隊友都鬧係「正狗屎」，最終輸波輸埋品。
功利主義贏一粒收工

冇人懷疑C朗有幾勁，今次返到國家隊梗係想攞番「飛士」，可惜佢份人太過自私，家陣行緊衰運仲咁好火，又急於爭取表現，只會愈急愈躁，又點會有貨交呀？更何況上年9月接手葡萄牙嘅主帥費蘭度山度士，之前帶領希臘出晒名踢悶蛋足球，守強攻弱下經常採取「1比0」功利主義，先求穩守唔理場面有幾醜陋，總之贏波最實際，佢轉教葡軍後照辦煮碗，從近3仗都贏1比0係最佳證明。
塞爾維亞靠晒英超兵

塞爾維亞自2010年南非世盃後就未入過大賽決賽周，雖有伊雲洛域、尼曼查馬迪、拿沙馬高域、高拉洛夫等英超兵壓陣，但總係予人散兵游勇、各自為戰嘅感覺，上年10月更因球迷搞事，令佢哋由大勝阿爾巴尼亞3粒變被判輸0比3。好彩佢哋都想知恥近乎勇，賽前「得分後衞」伊雲洛域就話要搏甩髀盯死C朗，又有佢車仔隊友尼曼查馬迪喺中場做掃蕩，連熱身賽近6場作客有5仗開細，作客絕對頂得兩嘴。

現時葡萄牙喺I組3戰得6分排第2，落後榜首丹麥1分但打少一場，由於小組頭兩名可取得決賽周入場券，若果擊敗塞爾維亞可進一步鞏固出線資格，但以佢哋偏向保守嘅打法難以大炒，讓球主客和葡軍讓一球，斯維認為佢哋可以藉主場之利贏一粒，3.1倍嘅讓球和絕對博得過。