四蘭爭妍 搶分互片

猪拉多纳

愛爾蘭夠硬淨唔赦波蘭

今晚歐國盃外圍賽上演「蘭」花爭妍！愛爾蘭、波蘭、北愛爾蘭、芬蘭以往喺外圍賽大部分時間都係擔當配襯角色，難得今屆決賽周席位增加至24個，就算爭唔到首兩名直接出線，但只要攞到第3名起碼仲有可以踢附加賽博吓，因此呢4朵「蘭」花今晚誓要爭妍鬥艷，全力搶分，務求闖入決賽周，做番次主角。

D組愛爾蘭主場迎戰波蘭。波蘭現時於小組4戰不敗排榜首，但要留意佢哋兩場作客勝仗對手只係未入流嘅直布羅陀及格魯吉亞，今次對住有番咁上下硬淨嘅愛爾蘭仲要人腳不整，所以未必惡得出樣，平手盤寧揀主隊愛爾蘭。

（有線62及202台周一凌晨2時45分直播）

世界盃冠軍德國原本以為會喺D組一枝獨秀，點知踢完4輪分組賽，排榜首嘅係今場主角之一嘅波蘭。波蘭目前4戰3勝1和未輸過，主場擊敗德國更加堪稱近年代表作，不過呢支球隊作客表現一向唔算穩定，睇番上屆世盃外圍賽，佢哋喺歐洲區外圍賽作客只係贏過魚腩聖馬力諾，其餘對住烏克蘭、黑山、摩爾多瓦呢類二線球隊都贏唔到。今屆波蘭之前兩次作客贏波對手分別係此組陪跑分子直布羅陀和格魯吉亞，今次對住現時有7分、仲有機會同自己爭出線嘅愛爾蘭冇明顯優勢。
羅拔仔孤掌難鳴

愛爾蘭主帥奧尼爾領軍一向有料到，今屆外圍賽作客德國差啲贏埋對手。陣容方面，効力洛杉磯銀河嘅羅比堅尼已經歸隊，另外奇雲杜里、沙恩朗、艾登麥基迪、占士麥卡菲等主力俱可候命，夫添出擊更加予人信心。

波蘭今仗有多蒙特孖寶巴拉斯塞高斯基及比薛斯基因傷避戰，中場波蘭斯基、哥錫基及後衞保尼斯治亦未有入選，僅靠羅拔利雲度夫斯基一個喺前線，面對硬橋硬馬嘅愛爾蘭實有孤掌難鳴之感，平手盤一於捧主隊啦。