希臘易帥沖喜有力剝牙

猪拉多纳

嚟到國際賽期，要搵筍嘢總係特別難，歐國盃外圍賽都話大家想爭決賽周入場券打生打死啫，若果係一些無關痛癢嘅熱身賽，揀波難度就進一步提升。

好似上周中德國主場對澳洲，前者話晒係應屆世盃盟主，莊家開出讓球半/兩球尚算合理，初段又順風順水先入波，諗住呢個上盤執硬喇，點知班友卻輕敵，攻極都攻唔入「燕梳球」，就畀澳洲幾下突擊殺到措手不及，最終各二言和算執番身彩，但跣到一眾上盤客攤攤腰。始終仲有咁多場波玩，無謂夾硬玩呢類贏輸都冇所謂嘅「拍跳」喇。
匈牙利唔使讓波畀晒貼士

至於是日重心場次，係歐國外F組第3位嘅匈牙利主場迎戰包尾大幡希臘，後者喺小組4戰輸3場，頹到冇朋友，理應被睇低一線，但有莊家開出平手盤，匈牙利咁都唔使讓波筍得滯喎，查實今仗係希臘新領隊馬卡利安接手後首場領軍比賽，新帥效應絕對不能睇小，肥叔建議要希臘。

至於D組愛爾蘭主場硬撼一哥波蘭，雙方只差3分，為爭出線必定搏甩髀，波蘭有神鋒羅拔利雲度夫斯基助陣，唔愁冇波入，佢哋近6仗5度開大，肥叔認為揀大盤比客W更穩陣。