悉尼受讓有着數 巴西智利開大騷

猪拉多纳

每逢國際賽，度波最緊要係貴精不貴多，畢竟依家一年365日都有波踢，趁國際賽回氣儲彈藥抖足精神，休息係為走更遠嘅路。今日簡單推介兩場，就係巴西對智利入球大（開賽時間：周日晚10:00），同埋FC悉尼下盤（開賽時間：周日中午12:00）。

巴西經過世盃失利後搵鄧加回巢執教，唔經唔覺已經連贏7場，上周中反勝法國3:1一役，更顯示出班球員充滿鬥心，其中「新比利」尼馬狀態甚勇，世盃後已攻入8入球，腳風咁順今場隨時又有士哥。

巴西近況咁好，同班「森巴兵」力爭表現博入選今夏美洲國家盃大軍名單係主要原因，事關領隊鄧加出名紀律嚴明，就算幾大牌都好，冇態一樣冇面畀，重返國家隊嘅羅賓奴已表明極希望出戰美洲國家盃，佢同一班邊緣國腳自然冇得偷懶。
威靈頓鳳凰7件國腳缺陣

智利上周中0:2不敵伊朗，但嗰場波佢哋收起咗中場大腦維達爾，主將阿歷斯山齊士亦只係後備入替，擺明留力今場砌巴西。由於今場波喺中立場酋長球場舉行，今季喺阿仙奴表現神勇嘅「A山」佔有主場之利，既然兩隊主將都咁弗，兩軍近6次交手又有5次開大，今場捧大啱數。

另邊廂澳職嘅威靈頓鳳凰對FC悉尼，鳳凰有尼敦般斯、麥堅治、保沙爾、湯杜爾、路爾斯芬頓、泰拿保特同祖史堤芬斯7件新西蘭、澳洲國腳缺陣，等同讓半臂，FC悉尼仲有得爭常規賽冠軍，今仗必趁對手殘陣搏殺，受讓平半下盤值博。
樂比推介：巴西（入球大）、FC悉尼（下盤）