英格蘭銳意搶W

猪拉多纳

哈利仔正印掛帥 誓雪大賽屈辱

今晚深夜國際熱身賽重頭戲碼，意大利主場惡鬥英格蘭，英軍歷來4次喺大賽決賽周對意大利都畀對方剋死，但時移世易，「三獅兵團」人才湧現，淨係一位哈利卡尼都夠嚇窒對手。呢位當紅射手今仗可望擔正同朗尼合作攻堅，令人期待。反觀意大利正陷入青黃不接，搞到要搵歸化球員救亡，對於4屆世盃盟主而言，實在非常失禮。由於係熱身賽，預計雙方會輪換試陣，更加考驗兩軍後備力量，英軍板櫈深度遠勝意軍，作客一樣夠贏。

（周三凌晨2時45分開賽）
朗尼追趕卜比Sir紀錄

雙方喺上年世界盃分組賽交鋒，當時英格蘭輸1比2，但最終兩隊齊齊小組出局，可謂難兄難弟。不過英格蘭復元明顯較快，歐國盃外圍賽更5戰全勝。英軍比意軍優勝地方係有一批25歲以下嘅出色年輕球員接班，其中佐敦軒達臣今季大熟大勇，證明自己足以代替「雙特」退隊後嘅位置。依家仲有哈利卡尼冒起，此子頭頂腳踢瓣瓣精，喺前線任何位置都識入波，甚有舒利亞影子，上仗歐國盃外圍賽，後備上陣唔夠兩分鐘即入波。由於史達寧同韋碧克已提早離隊，相信領隊鶴臣今場會派哈利卡尼黟拍朗尼，等哈利仔有更多時間發揮，入波機會自然更高。朗尼亦要顯身價，以免被後輩搶晒風頭，加上佢只差兩球，就可以追平名宿卜比查爾頓嘅國家隊入波紀錄，因此絕唔會留手。
意大利派大量副選

至於意大利近年欠缺新血，領隊干地今次召入巴西裔前鋒艾達馬田斯、阿根廷裔中場法蘭高華斯基斯幫手，可謂執巴、阿兩國二攤，情況有幾惡劣，可想而知。加上派路、迪羅斯因傷冇入選，門將保方有傷上陣成疑，本身人腳已經唔齊整，而干地今仗仲講到明會派大量副選上陣以吸收比賽經驗，整體實力進一步受削。英格蘭喺4次國際大賽被意大利食住之仇，今晚唔報仲等幾時？
意英大賽恩仇錄

1980歐國盃決賽

英格蘭0:1意大利

1990世界盃季軍戰

意大利2:1英格蘭

2012歐國盃8強戰

英格蘭0:0意大利(12碼2:4)

2014世界盃分組賽

英格蘭1:2意大利