荷蘭冇火 頂唔順西班牙

猪拉多纳

同晚另一場重量級國際熱身賽，上演2010年世盃決賽翻版戰，由當屆盟主西班牙作客荷蘭，雖然「橙軍」喺去年世盃早已報番一箭之仇，但青黃不接問題未解決，成班波真係唔多妥。反觀西班牙新星艾斯高、艾華路莫拉達、佐治高基等勁過荷蘭班新人多多聲，為博上位實玩到「橙軍」陀陀擰，斯維力撐「狂牛」客W。

（周三凌晨2時45分開賽、馬會網上文字直播）
冇尹佬洛賓惡唔出樣

荷蘭喺上年世盃首仗大炒西班牙5比1，被視為「狂牛王朝」崩潰嘅導火線，但心水清嘅球迷都知道，荷蘭嗰場係贏在尹佩斯同洛賓個人表演，咁蹺今輪國際賽佢兩個因傷落選，上仗對土耳其即老鼠拉龜幾乎輸埋，證明呢對正副隊長仍係不可或缺。

世盃後重掌荷蘭帥印嘅希丁克，推翻晒前任尹戈爾主打突擊嘅352陣式，夾硬用番傳統進攻型嘅433，但陣中嘅韋拿杜姆、迪比、馬田斯恩迪、迪維積等新人經驗尚淺，老將史奈達同尼祖迪莊走緊下坡控制唔到中場，令箭頭亨特拉爾孤掌難鳴。可見青黃不接問題嚴重。
小狂牛件件質素高

西班牙一向人才輩出，世盃慘敗反而加速佢哋更新換代，隨住老將沙維同沙比阿朗素等退役，艾斯高同佐治高基極速上位，保持「狂牛」搓到你暈嘅打法，箭頭艾華路莫拉達腳風甚順，上仗對烏克蘭更攻入喺國家隊嘅開齋波，雖然隊長兼門神卡斯拿斯繼續擔正，但迪基亞喺曼聯早已證明佢已青出於藍，呢班新人無論質素定狀態，都贏足「橙軍」幾條街，為博上位今仗更加係不勝無歸，客W真係有買趁早。