日本烏茲玩試陣敲半和

猪拉多纳

心態往往主宰咗一場波嘅勝負，今日响東京味之素球場上演嘅熱身賽，日本主帥夏利荷錫講明繼續試人，對手烏茲別克同樣借機考察新秀，呢啲波都唔使旨意兩邊會打真軍，2.3倍半場和點都值博過1.26倍主W。

（有線61及201周二晚6:25直播）

照舊踢番433陣式嘅日本，轉由夏利荷錫執教後，打法基本冇變，香川真司都話適應全冇問題，仲覺得踢起嚟好似「多蒙特Style」添。戰術維持不變固然好，問題係夏利荷錫今日先第2次帶隊打波，佢連人都未認得齊，梗係要個個試吓，佢老人家亦講明，今場會盡量畀機會對突尼西亞冇出過嘅球員，等佢哋騷吓Quali，即係話柴崎岳、乾貴士等都可能擔正，呢班人為咗博新帥垂青，一定會死嚟，只不過後衞酒井宏樹傷咗已經出唔到，陣容咁大變動，默契肯定唔慌好，上場喺大分贏突尼西亞半場都入唔到波，就足以反映問題。

烏茲別克早兩日作客1:1摸和南韓，表現唔曳，而且佢哋自2000年起兩次客戰日本，取得勝和各一，數字睇仲有優勢添，今場波關鍵就係睇佢哋肯唔肯搏嘞。但係烏茲別克都一樣試緊新人，好似23歲嘅鋒將馬杜夫，就係重點考察對象。既然兩隊都玩試陣，半場分唔到勝負好奇咩！