獅吼留手追半場和

猪拉多纳

今日晏晝上演澳職獨腳戲，由布里斯班獅吼主場撼中岸水手，獅吼個心早就飛咗去下周中亞冠分組賽，為爭出線今仗留力唔奇，但水手狀態亦跌晒Watt，累鬥累下勝負難料，一隊hea踢，另一隊勁頹，初段隨時大放悶蛋，斯維建議捧半場和。

（有線64及203台周四下午5時直播）
有亞冠盃後顧無心戀戰

雖然布里斯班獅吼仍力爭前6嘅季後賽入場券，但經過上輪不敵競爭對手墨爾本城後，喺打少場下被對手甩開8分，剩番5場波機會都幾渺茫，最弊係佢哋仲有後顧之憂。獅吼下周中就會喺亞冠盃G組分組賽作客南韓球隊水原藍翼，兩軍現時同得4分排第2及第3，絕對係出線生死戰，梗係重要過對中岸水手多多聲喇，況且諾夫、布萊治、桑蘇拿辛奴等主力又好番冇耐，為免再次受傷，今仗唔排除會收起佢哋，留番下仗對藍翼時搏殺好過。

獅吼就話留力啫，水手則陷於低潮，自2月中輸畀中超球隊廣州RF無緣殺入亞冠分組賽後，跟住6仗僅得1勝，前鋒麥西蒙因鼠蹊受傷提早收咧，令鋒力弱上加弱，惟有加強防守，睇番水手呢6仗全部開出半場和，證明佢哋初段頂得兩嘴，撞正心繫亞冠唔慌搏嘅獅吼，預計會係悶戰一場，既然水手咁旺半場和，呢場海軍鬥水兵與其估邊隊會贏，不如追多鋪半和好過喇。