禾堡為破紀錄大舉搶攻

猪拉多纳

今晚多蒙特對拜仁除咗係德甲「國家打吡」外，全球209個國際足協會員國，除北韓獨家冇得睇之外，其餘208個國家及地區都有轉播，堪稱舉世矚目！不過呢場大戰周日凌晨至開波，德甲早場仲有好嘢睇，禾夫斯堡踏入今年表現同成績甚至比「國家打吡」雙雄更出色，尤其主場火力無匹，今晚面對急需搶分嘅史特加，注定係一場入球騷，大盤值得捧場。

（有線61及201台周六晚9時30分直播）

禾夫斯堡目前位列德甲次席，亦已經先後打入德國盃同歐霸盃八強，球隊上下士氣如虹，雖然聯賽落後榜首拜仁10分，爭霸機會相當渺茫，但體育總監Ｋ阿羅夫斯認為只因拜仁實在太強，禾夫斯堡本身已經做到歷來最好，禾堡喺2009年德甲曾以兩分壓倒拜仁奪標，但當屆踢完26輪聯賽亦只攞到51分，今屆禾堡已經攞到54分，教練赫基只要喺餘下8輪聯賽攞到16分，就可以打破當年馬加夫保持嘅69分球會最高分紀錄。

禾堡今季已經豪花3,200萬歐元買入車路士嘅德國國腳舒賀爾尼，為咗留住陣中炙手可熱球星奇雲迪布尼，球隊已經許諾喺今夏繼續擴軍，初步對象包括向曼城回購09奪標功臣迪斯高，同皇馬射手查維亞靴南迪斯，咁多正面消息支持，今晚絕對唔會偷懶，事實上踏入今年後禾堡喺主場踢德甲同歐霸六戰全勝，每仗最少都入到兩球，主場出擊絕對係入球保證。

包尾史特加作客豁出去

史特加老帥史堤芬斯為護級近期亦豁出去，連仗搶攻，上仗主場以3比1擊退法蘭克福，護級重現曙光，不過攞完嗰三分仍然包緊尾，今仗和都冇着數，作客一樣會搶攻，入波又點會少？