卡蘭卡打人情牌借兵 米堡升呢反轉屈福特

猪拉多纳

英冠復活節快車有前列大戰上演，屈福特喺主場對米杜士堡，平手盤都要唔過，因為米堡領隊卡蘭卡人面夠廣，為咗爭冠軍，近日成功借用富咸中堅阿武列比達同史雲斯後衞迪安達里增強實力，擺明搏殺格，平手盤梗係撐2.05倍嘅米堡啦！

（TVB301周一晚7:30直播）
前皇馬助教個個畀面

屈福特日前作客以2:2賽和打比郡，暫時以2分落後榜首嘅米堡，仲有條件爭奪聯賽冠軍，可惜今季攻入8個聯賽入球嘅中場主力艾文阿布迪因傷上陣成疑，効力過祖雲達斯嘅右閘馬高莫達又要坐波監，就算近4次對賽有2勝2和都靠唔住。

另邊廂，米堡日前喺主場以1:0砌低韋根，重返榜首位置，但由於後衞丹尼爾艾耶拉同賴恩費特歷斯未康復，出任過皇家馬德里助教嘅領隊卡蘭卡，近日決定碌人情卡，借用富咸中堅阿武列比達同史雲斯後衞迪安達里返嚟幫手，需知道呢兩件都係英超級球星，咁有誠意，當然值得跟進。