費倫受讓有買趁祖

猪拉多纳

「埃及美斯」一個搞掂晒

今晚歐洲波意德法葡都有盃賽上演，多支喺聯賽爭冠無望嘅球會，都力圖喺本土盃賽發圍。其中最有睇頭嘅係意大利盃4強次回合，費倫天拿主場迎戰班霸祖雲達斯真係未驚過，「紫百合」首回合以2比1客勝祖記，打破對手連續47場主場不敗身，盡顯「盃賽殺手」本色，穆罕默德沙拿上仗意甲又入靚波，狀態銳不可當。反觀祖雲達斯受傷兵問題困擾，好難招架得住呢位「埃及美斯」，費倫主場仲有得受讓，必取讓球主勝。

（now 633周三凌晨2時45分直播）
有領先優勢 穩守突襲

費倫天拿喺意甲落後祖記21分，不過佢哋踢盃賽就非常醒神，已經打入歐霸盃8強。意盃4強首回合作客祖記，穆罕默德沙拿一人翻轉對手成條防線，個人梅開二度，爆冷先下一城。呢位車仔借將腳法細膩，速度亦快，佢喺上仗聯賽對前列分子森多利亞，又表演美斯式個人突破建功，可見意國球壇守將遇到佢真係冇晒符。由於費倫有領先優勢，今仗大可踢穩守突擊，更加有利「沙拿仔」發揮速度優勢。

連盃賽在內，費倫近10次主場出擊，共取得6勝4和，當中對手包括羅馬、熱刺、AC米蘭，夠晒說服力。事實上費倫喺聯賽首循環對祖記亦能力保不敗，呢場受讓好着數。
祖雲達斯殘陣 仲要顧歐聯

祖雲達斯表面上實力高啲，但家陣隱憂唔少，兩位中場大將派路、保羅普巴養傷，攻守能力皆受削弱，門將保方、中堅基亞連尼有輕傷、中場馬治斯奧喺跟隨國家隊練波時整傷埋，實令教練阿里基非常頭痛，因為球隊將於下周中又要出戰歐聯8強鬥摩納哥，唔希望踢殘班主力，更加唔想見到傷兵問題惡化。

權衡輕重之下，祖記隨時戰略性放棄重要性較低及較難翻盤嘅意盃，派副選應戰，戰意成疑，作客讓波更加不宜高估。