多蒙特賀芬咸開大片

猪拉多纳

爭玩歐霸搏盡鬥攻

德國盃8強戰今晚先演兩仗，焦點賽事係尾場多蒙特主場迎戰賀芬咸，兩軍向來都係世仇，加上今季聯賽成績欠理想，基於德國盃冠軍可以直接參加下屆歐霸盃，兩軍今仗必搏盡對攻，大盤係投X首選。

（TVB 01周三凌晨2時30分直播）

多蒙特經歷災難一季，一度位列榜尾，目前雖然回升至第10位，但要爭取下屆歐戰席位已經相當困難，德國盃冠軍成為佢哋參加下屆歐戰嘅唯一捷徑，亦希望藉此留住陣中包括曉姆斯和馬高列奧斯等大牌，球隊啱啱喺德甲主場以0比1不敵殘陣嘅班霸拜仁，不過整體表現已逐步改善。多蒙特球迷過去多次嘲諷賀芬咸嘅「金元足球」，令兩軍球迷成為世仇，今仗主場出擊當然不勝無歸。

賀芬咸喺聯賽排第7，球隊近況好唔穩定，上周末聯賽主場領先一球下遭慕遜加柏大炒，防線甩漏極多，最弊係教練基斯度提倡進攻足球，作客都唔識守，到訪有聲勢浩大主場球迷支持多蒙特嘅西法倫球場，預期想失少啲波都幾難。
禾堡強勢 炒起弗賴堡

至於頭場係強弱懸殊之戰，質高態勇嘅禾夫斯堡主場迎戰護級分子弗賴堡，禾堡聯賽次席位置打風都打唔甩，當然會將主力集中喺盃賽，佢哋今年各項賽事主場7連勝，合共轟入20球，今晚一樣強攻唔畀佢停。

弗賴堡上圈主場險勝科隆都係靠對手嘅烏龍波，近期聯賽雖然兩連勝，但護級形勢依然緊張，呢個時候作客禾堡明知唔夠砌，不如留番啲力護級好過，推介禾堡讓球主勝。

（TVB 13周三凌晨1時直播）