利華穩守拜仁唔攻正路開細

猪拉多纳

德國盃8強重頭戲，德甲4哥利華古遜主場挑戰班霸拜仁慕尼黑，利華古遜近況大勇，尤其防線近期堅穩健，遇上殘陣被迫改採守勢嘅拜仁，預期會係一場拉鋸戰，推介1.93倍細盤。

（TVB 13周四凌晨2時45分直播）

利華古遜於德甲保持5連勝，近8場正式賽事只曾喺歐聯作客馬體會時失過一球，不過當中只係對弱旅柏達邦，史特加同漢堡可以大勝，其餘5仗都開細，表現守強攻弱，近5場主場賽事更保持零失球，防線表現冇得頂，但前線就唔合格，球隊踢淘汰賽格外小心。前線主力孫興民喺該仗被逐，今晚要停賽，攻力受損下面對拜仁相信唔會冒進搶攻。另教練羅渣舒密特打拜仁一向有辦法，上季教奧地利薩爾斯堡時就喺熱身賽贏過拜仁，首循環作客安聯亦只輸0比1。兩軍上次喺德國盃碰頭係09年，當時利華亦曾喺8強主場淘汰拜仁，之後利華5次喺德甲主場對拜仁取得1勝3和1負佳績，當中4場都開細。

拜仁近期受到嚴重傷兵問題困擾，今仗一對魔翼洛賓同列貝利繼續缺陣，中場大將阿拉巴同查維馬天尼斯繼續倦勤，近期賽績難免受到影響，前仗聯賽主場吞慕遜加柏兩蛋，上仗作客小勝多蒙特1球，大部分時間被迫採取守勢，今晚作客都會以穩為先。
撐慕遜加柏炒起丙組仔

此外，今晚早場仲有另一場8強德丙比勒費爾德對德甲3哥慕遜加柏（TVB 01台周四凌晨1時直播），客軍喺歐霸出局後表現堅穩定，近期作客先後大炒拜仁同賀芬咸，球隊過去3次作客比勒費爾德都能夠淨贏兩球，今仗一於再追讓球客勝。