阿仙奴尼料連勝

猪拉多纳

般尼 Vs 阿仙奴 周日凌晨0:30 now621直播

阿仙奴勇闖8連勝！「兵工廠」最近氣勢一時無兩，佢哋已經一口氣連贏7場比賽，就連「寸王」莫連奴都忌佢哋三分，話「兵工廠」都係爭標分子！計勻歐洲5大聯賽，阿仙奴同拉素同樣拎到7連勝，係全歐狀態最好嘅兩隊波，今晚阿仙奴食住個勢作客護級分子般尼，就算讓半一都冇有怕，一於捧1.73倍嘅上盤啦！
入3球+4次助攻 奧斯爾傷愈回勇

「兵工廠」最近成績非常對辦，同季初嗰陣嘅表現簡直係判若兩隊，多數球迷都大讚基奧特入波停不了、阿歷斯山齊士展現世界級卡士、韋碧克夠料做亨利接班人等等，不過大家可能忽略咗「大眼仔」奧斯爾嘅影響力。自從呢位德國中場傷愈復出後愈踢愈好，狀態弗爆，近8場聯賽射入3球兼交咗4個靚助攻，包括上場聯賽對利物浦嘅靚爆罰球，有佢控制戰局，阿仙奴就梗係踢到水銀瀉地啦！

最重要一點，係阿仙奴依家傷兵陸續出番晒嚟，目前只得再度受傷嘅阿歷士張伯倫仲要抖多陣，中場韋舒亞、阿迪達、戴亞比據報都已經可以候命，咪忘記「超級後備」禾確特都想爭取表現，搏拎份高薪新合約，仲有後上王艾朗藍斯、辛迪卡索拉等等……「兵工廠」中前場咁多猛人雲集，一級射手又多到數唔晒，今晚對住般尼嘅豆腐防線，相信有機會重演首循環大勝3球嘅
漂亮勝仗！近10主場入10球 般尼地頭冇威力

冇錯，護級分子般尼早前趁國際賽檔期去咗西班牙集訓，上星期聯賽仲能夠賽和熱刺添，似乎集訓完之後狀態真係好咗，之不過佢哋今晚嘅對手係比熱刺更強嘅阿仙奴，況且般尼喺主場冇乜威勢，近10次主場出戰合共只係入咗10球，平均每場只得1球進帳，鋒力咁曳，今鋪似係大敗之餘，隨時連蛋都未必破到！
盤路解碼：阿仙奴今季聯賽31戰開22口入球大。

Data King

‧兵工廠射手基奧特近10仗轟入10粒。

‧阿仙奴今季聯賽憑死球攻入20球，為英超之最。

‧般尼主場喺比賽最後15分鐘時段僅出現3個入球，英超各球場中最少。

‧只要兵工廠贏埋呢場，即可成為今季首支英超8連勝嘅球隊。