尹戈爾終於砌啱個陣

猪拉多纳

現今球壇多用陣式，尤其係英超球隊都離唔開使用451、4231或433陣式，全部都係打單箭頭，後面有5名中場球員瞻前顧後，除非處於落後階段，否則甚少採用如442或352等雙中鋒陣式，近況急速冒升嘅曼聯係最佳例子。

紅魔領隊尹戈爾經過不斷嘗試後，似乎終於找對了路，近期頻頻派朗尼打單箭頭，係人都知呢位隊長最擅長踢影子中鋒，而非喺禁區等人餵波嘅機會主義者，尹帥利用佢在前場不斷走動，製造空位畀隊友後上入楔，好似桑馬達、安達靴里拉、費蘭尼等最近就頻有士哥，既然愈踢愈順，相信尹帥都唔會亂咁變陣。

至於同市死敵曼城就係反面教材，主帥比歷連尼比較鍾意採用雙中鋒，好似上仗敗走水晶宮一役，前面亦係用迪斯高夥拍阿古路，可惜效果強差人意，正如今日金句所講「雙中鋒陣式已非時尚陣式」，好多教頭更傾向打單箭頭，藉住增加中場球員人數同更細緻分工，以確保攻守平衡。
曼城作客勢危

講番今晚英超嘅曼市打吡，曼聯狀態大勇，眾將喺新陣式磨合成功後打出信心，相反曼城演出持續下滑，特別係一班後衞冇晒鬥心兼頻頻犯錯，Peter認為今場係一場XX之爭，捧有地利嘅紅魔更加着數。

金句：雙中鋒陣式，已非時尚陣式