AC冇起色讓唔起森多

猪拉多纳

AC米蘭近年成績大跌watt，上季衰到連歐霸盃入場券都攞唔到。今季雖搵嚟名宿恩沙基教波，弊在演出依然冇太大起色，仲隨時連續兩年緣盡歐洲賽。今晚佢哋主場迎戰表現勁硬淨嘅森多利亞，竟然要讓對手半一，1.69倍下盤唔好錯過。

（TVB301台周一凌晨2:45直播）

「紅黑軍團」今季夾硬升咗做得2季嘅青年軍教頭恩沙基擔正，就連另一名宿加度素都認為呢個決定太急。結果呢支褪色班霸喺今輪聯賽未開始前，僅得41分守喺意甲第8位。莫講話歐聯，隨時連歐霸盃都踢唔到。AC近期連續5場主場不敗聽落係威係勢，查賽對手全部嚟自中下游，包括榜尾3弱帕爾馬、卡利亞里同切塞納，呢鋪實在不宜過分高估佢哋囉。
森多利亞意甲8成不敗

另邊廂嘅森多利亞雖然上仗敗走費倫天拿，不過呢班波勝在夠爛打，今季未試過連續2場輸波。睇番佢哋喺聯賽29戰只係輸過5場，不敗率超過8成。盛傳教練米赫洛域畀拿玻里睇中，有意下季搵佢接手，今仗就算有守將列基尼停賽，相信都阻唔到米帥做番齣好戲，為自己跳槽增加籌碼啦！