肥安吸取教訓有計破敵

猪拉多纳

馬德里兩大歡喜冤家──皇馬同馬體會今晚於歐聯8強相遇，馬體會雖坐擁地利，兼有個有料教頭施蒙尼，但皇馬主帥「肥安」安察洛堤Quali其實一啲都唔差，話晒於執教生涯曾經3奪歐聯錦標，上屆決賽於劣勢下反勝「床單兵團」有辦你睇。正所謂失敗乃成功之母，就算今季幾次交手都未贏過，Peter仍然相信吸取咗教訓嘅「肥安」會諗到計仔，「銀河艦隊」唔會再好似之前喺聯賽同西盃嘅本土賽事咁處於下風，今仗作客起碼坐和，甚至有少少機會贏埋添！
祖記忍辱負重搏呢場

同晚另一場8強首回合祖雲達斯主場對摩納哥，由於Peter今季經常有機會評述意甲，淨係祖記都講過成10場波啦！對於佢哋可謂非常熟悉，呢班波一向以目標為本，為爭勝不惜一切。好似佢哋日前竟然喺聯賽爆大冷不敵帕爾馬，堂堂榜首球隊輸畀包尾大幡真係好瘀，不過「斑馬兵團」為咗留力應付呢場歐聯大戰，示人以弱又有乜所謂，更何況聯賽佢哋已經贏梗冠軍咁滯，攞少3分亦無傷大雅，忍辱負重，喺歐聯行得更遠先至係Point呀！對手摩納哥上圈爆冷淘汰阿仙奴，無疑係神來之筆，但神秘感已經盡失，預計歐戰經驗豐富嘅祖記唔會輕敵，主勝機會高唱入雲。

金句：西班牙本土就馬體威，歐聯我信皇馬囉