高手過招細均力敵

猪拉多纳

歐聯8強戰首回合今晚開打，嚟到呢啲關鍵時刻，相信可以殺入8強嘅球隊都會踢得非常謹慎；再加上今場只係首回合賽事，鬼Sir覺得呢啲「強強」對壘，入波真係唔會多。今晚兩場波「馬德里打吡」同祖雲達斯鬥摩納哥，大有機會開出細盤。
踢法謹慎入波唔慌多

鬼Sir當年做球員嘅時候，都踢過唔少呢類型嘅「強強」大戰，記得每逢進行呢啲大戰，自己同一眾隊友都會特別專注，互相提醒唔可以出現任何錯誤。因為呢類高手過招嘅場合，勝負可能只係一球起兩球止，如果出現唔小心嘅失誤，就大有機會斷送球隊嘅勝利，嚴重啲甚至乎喪失奪標機會，如此一季努力就此白費，所以嚟到呢啲關鍵大戰，兩隊球員一定會踢得非常小心同謹慎，前鋒入唔入到波係另一回事，但肯定盡力以唔失波為首要目標。

由於今晚只係首回合賽事，鬼Sir相信作客嘅兩隊都會盡量以不失球為首要目標，佔主場之利嘅一方就算強行進攻，亦未必有能力可攻敗「死守」一方嘅大門。因此，鬼Sir認為今晚兩場歐聯8強戰首回合賽事都唔會出現大手交易，捧細盤絕對合理。