先客後主 巴塞拜仁使乜急搶W？

猪拉多纳

Peter一向認為，歐聯每逢踏入兩回合嘅淘汰賽，高手過招總係會步步為營，睇準「餐士」先至作出致命一擊，教頭最重要係保持耐性，相互間鬥智鬥力，連同現場嘅緊張大戰氣氛，加加埋埋就足以令全球億萬球迷津津樂道，呢個亦係歐聯魅力所在。

今晚8強首回合重頭戲，上圈勇挫車仔嘅法甲豪門巴黎聖日耳門（PSG），將會喺主場迎戰「地上最強」巴塞隆拿。Peter永遠相信踢波嘅嘢係先講實力，運氣其次。現時奪標次熱門巴塞始終係技高一籌，因此晉級機會較高。不過，佢哋今仗作客應會穩陣至上，唔會輕舉妄動，留待次回合返回魯營主場先至搞掂PSG，呢支西甲一哥作客和波嘅機會高。

至於奪標大熱嘅德甲榜首拜仁則作客葡超勁旅波圖，由於佢哋依家傷兵一大籮，未到緊要關頭不宜過分拚搏，最重要係佢哋同巴塞一樣有「先客後主」嘅優惠，心理上首回合會傾向較為保守，主帥哥迪奧拿習慣利用其控球在腳嘅強項先穩住陣腳，令對手連波皮都掂唔到，咁就可以立於不敗之地。
和波過關好合理

睇番16強首回合拜仁作客實力差一皮嘅烏克蘭薩克達，強陣出擊卻大踢悶波，最終互交白卷，以為佢哋冇料到。點知次回合返回主場即上演一幕大屠殺，狂掃對手7蛋出線，預計今仗哥帥都係會用番同一戰略。波圖方面雖有主場之利，但對手始終係高一班嘅拜仁，佢哋遇強亦唔敢冒進，否則隨時跌入「宇宙仁」嘅控球漩渦咁就大件事。既然大家都唔急於贏波，今仗和波亦屬正路。
金句：兩大歐聯熱門，作客以和為貴！