PSG鬥巴塞大有睇頭

猪拉多纳

南美Goal手Show Time！

歐聯8強首回合繼續開騷，今晚重量級戲碼當然係法甲豪門巴黎聖日耳門（PSG）迎戰「地上最強」巴塞隆拿啦！呢兩班波「不是冤家不聚頭」，近3屆歐聯激鬥4次，每次都炮製大量入波，今晚PSG王牌前鋒伊巴謙莫域雖然停賽，但由卡雲尼、拿維斯同柏斯托尼組成嘅「南美三叉戟」，火力唔會差得過巴塞嘅「南美MSN」，一於捧1.82倍入球大，睇6大美洲Goal手過招啦！

（有線61、64、201及203、中央5台周四凌晨2:45直播）
PSG主場歐戰 8年幾未輸過

PSG有王牌射手伊巴謙莫域坐波監、守將大衞雷斯因傷缺陣，表面睇牌面無疑係低巴塞一線，之不過大家留意番，查實呢班波每次喺地頭王子球場出擊，威力都好強大，唔經唔覺，原來佢哋喺歐戰主場已經連續33場不敗，對上一次輸波，要數到8年半前2006年11月嘅事喇，淨係呢個黃金數據，已經話晒畀大家知PSG主場有幾堅啦！巴塞今晚作客要贏波堅唔容易，相比之下，開入球大機會就高得多喇！

點解？事關兩軍2年前亦曾經喺8強狹路相逢，當時巴塞只係靠作客入球優惠晉級，今屆兩隊分組賽同組，就各自喺地頭贏波，證明大家實力不相伯仲，只不過，呢4場波入面有3仗都係開入球大，PSG入咗足足7球，巴塞就有8球進帳，證明「巴巴相遇」堅係「大」戰保證！
卡雲尼誓KO蘇神爭口氣

講到今場嘅Talking Point，唔使問，梗係兩隊南美鋒線鬥法啦！巴塞件阿根廷球王美斯、巴西天王尼馬、烏拉圭神箭蘇亞雷斯愈踢愈合拍，佢哋喺分組賽就係每人一粒搞掂PSG喇！不過大家亦咪睇小聖日耳門「南美幫」，拿維斯同柏斯托尼呢對孖寶合作一流，而且佢哋長年畀美斯騎住，點都想爭番口氣威番鋪，至於卡雲尼就仲慘，因為一個蘇亞雷斯，令佢嘅地位經常被低估，查實卡雲尼嘅級數根本唔差得過蘇亞雷斯，既然6支南美大炮都咁好火，呢鋪唔玩「大」佢等幾時先？
頂占筍盤：巴黎聖日耳門（入球大）

Data King：巴塞歐聯作客旺半大

‧雙方過去6次歐聯對決，每場都互相攻破對方大門。

‧聖日耳門今屆歐聯8戰失10球，為8強中失球最多隊伍。

‧聖日耳門箭頭卡雲尼近3戰歐聯主場斬獲4球。

‧巴塞今屆4場歐聯作客開出3口「半場大」。
乜都玩錦囊：信攤路玩埋半場大

「雙巴」喺今屆歐聯分組賽交鋒，兩戰上半場都出現3粒入波唔在講，PSG箭頭卡雲尼主場踢歐聯又特別醒神，近3場斬獲4球，加埋巴塞今屆歐聯4場作客3場開出「半場大」嘅數據支持，今場不妨博埋個2.65倍「半場大」。
盤路解碼：兩軍歐聯史上6次交鋒，作客一方從未獲勝，只得3和3負。