狼堡雙引擎踢好玻

猪拉多纳

車仔棄將證身價

歐霸盃8強首回合大戰今晚上演，禾夫斯堡喺主場對拿玻里，熱捧1.68倍主勝！事關「狼堡」有兩個「車路士引擎」奇雲迪布尼同舒賀爾尼推動，強到連拜仁慕尼黑都畀佢哋摧毀，相反拿玻里嘅教練賓尼迪斯掛住返英超搵銀，軍心受損咪掂！

（有線61、201及廣東體育周五凌晨3:05直播）

禾夫斯堡歇冬後首戰喺主場以4:1打沉拜仁，成功將強勢延續到2015年。日前禾夫斯堡喺德甲作客以2:0搞掂漢堡，贏得相當輕鬆，兩個車仔棄將奇雲迪布尼同舒賀爾尼，最近更加踢到曉飛咁款，為咗證明自己唔係廢柴，佢哋實會把握機會喺歐霸盃入多幾球向車仔高層示威。
迪布尼弗爆多人爭

事實上，奇雲迪布尼都曾經講過，要用實力證明車仔領隊莫連奴放棄佢係錯嘅，而且依家大把頂級球會想撬佢過檔，鬥心肯定無敵。加上射手巴斯杜斯今季一樣有料到，同樣大把球會爭住搶，依照禾夫斯堡目前嘅強大攻擊力，要喺首回合主場先拔頭籌絕對唔係難事。
拿玻里肥賓傳過曼城

另邊廂嘅拿玻里日前喺意甲主場以3:0打沉費倫天拿，總算結束連續5場不勝走勢，弊在佢哋嘅中場大將咸錫，近期無厘頭被打入冷宮，整隊士氣受好大打擊。仲有呀，日前有消息話，曼城想搵賓尼迪斯領軍，而且佢都好有興趣咁話，隨時激起拿玻里球員嘅不滿同反抗情緒，咁搞法睇怕都幾難全身而退。
盤路解碼：拿玻里近9次「讓球」有6次輸盤。

Data King：狼堡主場8連勝

‧禾夫斯堡主場8連勝。

‧禾夫斯堡今屆10戰有6勝2和2負。

‧拿玻里連續6場開半場細。

‧拿玻里近8次作客德國球會得3和5負。
乜都玩錦囊：吼埋狼堡第一隊入球

禾夫斯堡前線火力強勁，而且好鍾意壓住對手攻，對上6場更加有5次先開紀錄，加上佢哋主場氣勢強勁，照道理今仗肯定會搏命爭取入球，為次回合作客意大利打定底，所以有興趣嘅話，其實1.52倍禾夫斯堡第一隊入球都好值得留意。