歐霸地頭5戰全勝轟15球

猪拉多纳

基輔主W手到「拿」來

烏克蘭勁旅基輔戴拿模今屆歐霸盃表現標青，唔單止主場全部贏晒，每場亦最少斬獲兩球，火力絕對唔講得笑。佢哋今晚喺8強首回合主場出擊，迎戰近兩場吞蛋吞到傻嘅「紫百合」費倫天拿，首選2.25倍主勝，進取嘅不妨揀埋4.8倍「讓主」！

（有線62及202周五凌晨3:05直播）
進攻好手悉數上陣

基輔戴拿模主場威力強勁，今屆歐霸盃5戰全勝合共斬獲15球，每場最少以兩球差距贏波，戰績靚到嘩嘩聲，唔捧場點得呀？再講，對上嗰圈兩鬥愛華頓都有入波嘅侯施域，連同耶莫蘭高、卡維斯同謝明蘭斯等進攻好手可以落場搏殺，加埋中場悍將貝漢達坐完3場波監後復出，要延續主場強勢唔難啫。
費倫首席射手侯馬養傷

近況曳到震嘅費倫天拿，繼意盃4強慘敗畀祖雲達斯出局後，返到意甲作客拿玻里再輸，兩場淨吞6蛋，真係吞蛋吞到飽。「紫百合」最弊係首席射手侯馬唔踢得，早排踢到曉飛嘅穆罕默德沙拿近期又冇貨交，對上兩圈都有進帳嘅中堅荷西巴辛達，又因為黃牌夠數要坐波監，進一步削弱攻守實力，睇嚟佢哋今次遠征烏克蘭想唔輸都幾難。