西維爾揮低殘陣辛尼特

猪拉多纳

另一場歐霸盃8強首回合賽事同樣精彩，由西維爾主場鬥辛尼特。兩軍教頭曾先後高舉過歐霸盃冠軍，呢次高手過招梗係好睇過戲。之不過辛尼特近年患上「恐西症」，況且今仗有4件主力停賽，呢鋪佢哋就算今仗受讓半一都要唔過，點睇都係揀1.87倍上盤穩陣。

（有線64、203周五凌晨3:05直播）
辛尼特患「恐西症」

辛尼特教練保亞斯喺11年幫波圖成為歐霸盃盟主，之後挾「莫連奴二世」之名轉戰英超，可惜連續敗走車路士同熱刺。不過佢上年執掌辛尼特後領軍出色，家陣穩坐聯賽榜首之餘亦殺入歐霸盃8強。弊在呢班波患有「恐西症」，連續5次作客西班牙都輸波而回。最大鑊嘅係前鋒侯克、中場丹尼艾維斯、守將基斯薛圖、同施莫尼哥夫今仗齊齊坐波監，睇怕保亞斯使出所有真功夫都未必搞得掂。
西維爾歐戰主場7連勝

至於西維爾教頭安梅利喺上年幫球隊勇奪歐霸盃冠軍，今屆食過翻尋味力求衞冕。佢哋上場喺落後2球下追和巴塞2:2，士氣high爆之餘亦足見安梅利調兵遣將係有一手。況且球隊歐戰主場勁惡錄得7連勝，加上中場基祖華克復出，安梅利今晚仲唔趁對手陣容甩皮甩骨先拔頭籌咩！