逼走神醫 哥迪奧拿下鋪賴邊個？

猪拉多纳

有關德國足球嘅壞消息連日接踵而來，德甲包尾嘅漢堡衰到冇人肯教，焗住搵失敗教頭拉巴迪亞救亡......多蒙特功勳教頭高普掛冠......德甲雙雄拜仁慕尼黑同禾夫斯堡分別喺歐聯同歐霸遭逢慘敗......然後到拜仁神醫禾法特辭職，跟住仲收到拜仁一眾傷兵都無緣趕及喺下周中嘅歐聯八強次回合對波圖復出，要收復失地真係難上加難。

禾夫斯堡啱啱崛起，教練同球員都欠經驗，今次不敵拿玻里，喺賓尼迪斯、希古恩同咸錫身上上咗一課，對佢哋下屆參戰歐聯提供咗寶貴經驗。不過拜仁就唔同，佢哋兩年前已經係五冠王，哥迪奧拿上任後得到會方支持，既向多蒙特撬入咗馬里奧葛斯同羅拔利雲度夫斯基，又滿足佢要求，收購咗堤亞高艾簡達拿、貝拿迪亞、祖安巴尼特同沙比阿朗素，但教咗近兩季，交出嚟嘅成績好明顯無法令人滿意。
禾法特不滿遭卸責辭職

神醫禾法特効力拜仁38年，德高望重，洛賓因為多得佢而重返職業生涯高峰，連飛人保特都山長水遠慕名搵佢醫，江湖地位非凡。哥迪奧拿唔妥佢，唔理誰是誰非都好，點都唔應該喺首回合對波圖嘅比賽途中作出嘲諷，作為一個教練，輸緊波時應該專心度吓點樣收復失地，而唔係發身邊人脾氣，賽後將輸波責任卸落隊醫度，難怪神醫發火劈炮，但依家剩低半隊傷兵點搞？哥帥下場失利又可以將責任卸畀邊個？
拜仁留力博賀芬咸冷Ｗ

拜仁下周三凌晨就要踢歐聯八強次回合，距離今晚德甲作客賀芬咸得番三日，一眾傷兵都無緣復出，哥帥手上只得十五、六個球員用，既然聯賽已經有十分優勢，今晚只求慳力同唔再增添傷兵，賀芬咸每遇拜仁都格外精神，主Ｗ有5.3倍好值博。

（有線61及201台周六晚9時30分直播）