哥連泰斯半場和啱數

猪拉多纳

4強1take過 折箭更保守

巴西聖保羅省聯賽展開四強大戰，頭場由哥連泰斯主場對彭美拉斯，巴西近期爆發登革熱，哥軍射手荷西古里路不幸中招，預料無緣今場比賽，無疑削弱球隊入波能力。加上賽事屬於一戰定生死，賽和不設加時，立即互射12碼分勝負，稍有差池隨時冇仇報。估計雙方會踢得比較謹慎，形成拉鋸局面，博1.95倍半場和。

（周一凌晨3時開賽‧馬會網上文字直播）

哥連泰斯係分組賽最佳成績球隊，理應秤先，無奈陣中首席射手荷西古里路感染登革熱未能披甲，打亂教練迪迪嘅部署，尤其是進攻方面影響最大；加上哥連泰斯近期亦要兼顧南美自由盃，賽程頻密，隨時踢到腳仔軟。至於彭美拉斯近十次對哥連泰斯，僅一勝四和五負，完全被對手食住，睇怕今次作客都唔敢輕舉妄動，甚至寧願守和博互射12碼好過，上半場冇交收好正路。
柏圖翻生 聖保羅受讓筍

另一場四強，山度士主場對聖保羅，聖保羅球星柏圖翻生，今季巴省聯已入咗八球，位居射手榜次席，拍檔卡亞迪斯亦有七球進帳，兩人堪稱巴省聯黃金組合，估計今仗會對山度士防線構成重大威脅。主隊山度士兩位守將大衞巴斯、古斯達禾漢歷基皆受傷患困擾，防線告急，今仗冇能力讓聖保羅平半，下盤絕對捧得過。

（周一清晨5時30分開賽‧馬會網上文字直播）