西維爾猛火炒起格蘭納達

猪拉多纳

（日）38 CF格蘭納達 Vs 西維爾 西甲 23:00

西維爾日前憑丹尼斯蘇亞雷斯完場前入波，喺歐霸盃8強首回合主場反勝辛尼特2:1，大大提升球員士氣。佢哋今晚返到西甲戰線造訪CF格蘭納達，對手雖然急需搶分護級，可惜整體實力有限，相信同樣要搶分爭入前4嘅西維爾唔止贏波冇難度，甚至能夠大勝而回，一於捧西維爾3.1倍「讓客」。

（now632台、TVB13周日晚11:00直播）
格蘭納達唔識入波

格蘭納達今季主場成績見得吓人，踢15場只係輸過4場咁大把，弊在佢哋上輪作客艾美利亞嘅護級大戰，竟然淨吞3蛋，輸咗場6分波搞到元氣大傷，士氣想唔低落都難啦。再講吖，格蘭納達要護級唔係冇原因，佢哋係全西甲入波最少嘅球隊，仲要防守力唔係強，暫為身處降班區中失波最多嗰隊，今場點信得過先？

未計今輪西甲積分，西維爾暫時落後「4哥」華倫西亞3分，喺剩低7輪賽事，要爭逐前4搶得歐洲賽入場券，可以話再冇失分空間，即使有歐霸盃後顧之憂都必定搏到盡。西維爾中場班尼加上場聯賽鬥巴塞表現八面玲瓏，更有1球進帳，狀態弗到漏，今仗配合前線卡路士巴卡同加美路等尖刀，要撕破對手防線易過借火，而且佢哋近4場波無論對手強弱都可以場場省兩粒，盡顯強大火力，今場大勝一啲都唔出奇。