FC廣州細在必行

猪拉多纳

大簡主張1比0策略

亞冠盃分組賽今日戰火重燃，兩支中超球隊FC廣州（廣州恒大淘寶）、FC北京（北京國安）分途出擊，準備叫胡出線。H組恒大作客對南韓球隊FC首爾，只要和波就可以提早取得十六強席位，呢支「中國曼城」近期銳意改善防守，主帥簡拿華路更講明未來賽事會採取「1比0策略」，以悶蛋足球換取成績。FC首爾攻力弱，加上剛於聯賽慘敗，想贏都谷唔起，Mic少揀入球細。

（now 671周二晚6時30分直播）

恒大今屆亞冠盃四戰失七球，平均每場失1.75球，錄得球隊自2012年參賽以來，最差防守數據，令教練簡拿華路飽受批評。呢位意大利一代著名鐵衞決定做番「老本行」，變招採用意國傳統「1比0策略」，上仗中超果然小勝弱隊杭州綠城1比0，今季六場聯賽首次冇失波。由於恒大今場和波都可以出線，加上作客不利，「大簡」更加有大條道理踢「悶蛋足球」。事實上，只要球隊晉級，批評聲音自然減少，簡拿華路肯定以穩陣行前，唔會冒進。
作客首爾和波都出線

FC首爾兩年前打入決賽，因作客入球較少，被恒大搶走冠軍。呢支南韓球隊水準已今非昔比，上仗聯賽強陣出擊，竟以1比5慘敗於水原藍翼腳下，主將車斗里更傷出，今場上陣成疑，賠了夫人又折兵實在打擊士氣。FC首爾另一個死穴係攻力弱，四場亞冠盃分組賽僅入兩球，相信咬唔入恒大防線。
獅吼焗攻益晒國安

G組盃北京國安主場對布里斯班獅吼，國安攞一分都可以出線，反觀獅吼非勝不可，作客都要焗攻。不過呢支澳職球隊防守差，近兩場亞冠盃共失六球，勉強主攻隨時被對手反咬一口。獅吼首循環主場對國安都要輸波，今次作客更不樂觀，主勝要得過。

（now 670周二晚7時30分直播）