神戶防線「川」窿好「大」鑊

猪拉多纳

日聯盃B組有「大」戰上演，神戶勝利船今晚喺主場對川崎前鋒，玩1.65倍入球大有着數。經過季初一輪頹勢，最近神戶喺新教練尼仙奴領軍下強勢翻生，撞啱川崎射手大久保嘉人（上圖右）狀態大勇，招積到話要學三浦知良跳森巴舞慶祝入球，有佢幫手唔憂冇波入。

（開賽時間：周三晚6:00）
川崎大久保練定森巴舞等破紀錄

今季神戶搵到前柏雷素爾教練尼仙奴執教，季初表現係差咗啲，不過佢始終有料到，好快就領軍擺脫頹勢，日前神戶喺聯賽作客以2:2打和新潟天鵝後，更加連續5場不敗，證明球員已開始熟悉佢嘅戰術，不過佢哋後防近期連環出現傷兵，就算射手渡邊千真未知好番未，睇怕都會焗住攻開入球大。

另邊廂嘅川崎日前喺聯賽以3:2砌低仙台維加泰，射手大久保嘉人完場前又入波，再喺聯賽入兩球就可以超越三浦知良（139球），進佔日職歷代最多入球紀錄第4位。雖然今場日聯盃唔關事，但大久保嘉人賽前話，已經學定三浦知良嘅招牌森巴舞，準備破紀錄嘅時候慶祝，今場佢倒戈實搏命啦！