3大危帥 飯碗保衞戰

猪拉多纳

由爭冠軍降格到爭前4，係咪應該「豉椒炒魷」先？上季分別帶領曼城同利物浦爭奪英超冠軍嘅比歷連尼同羅渣士今季無以為繼，唔單止四大皆空，仲衰到連前4位置都未穩陣，咁嘅成績真係好難交代？不過炒領隊唔係豪門嘅專利，季中頂上離隊嘅柏杜坐正做紐卡素領隊嘅卡華亦係完全唔掂，搞到「喜鵲」係咁輸波，依家仲護緊級。呢3位高危主帥下季如想保住飯碗，今晚真係要醒醒定定，起碼要贏番場氹住老細同粉絲先啦！
維拉當弗唔赦曼城 比歷連尼隨時衰多鑊

服侍老細已經夠難，要服侍財大氣粗嘅老細就難上加難，曼城領隊比歷連尼手握一支陣容強大嘅球隊，但今季交唔出成績，都差唔多可以肯定要執包袱，冇計喇，老細畀咗咁多錢你，你連一隻盃都攞唔到，唔炒你至奇啦！「藍月亮」今晚對住阿士東維拉，雖然有主場之利，不過對住剛喺英足盃擊敗利物浦殺入決賽，狀態信心大盛嘅維拉，睇嚟又有失分危機，捧受讓嘅維拉！

（now 621周日凌晨零時30分直播）

「天要你亡，你不得不亡」，曼城近期唔單止狂輸波，晨咁早宣布衞冕失敗，家陣更位列4強之末，來屆即使攞到歐聯入場券，但極有可能要踢附加賽，以咁嘅巨型班嚟講真係冇面。最慘係佢哋依家傷兵成籮，隊長高柏尼、祖維迪、拿斯尼同基捷基治都傷晒，而占士米拿同韋菲特邦尼亦要為復出同時間競賽，至於中場發電機大衞施華上場對韋斯咸被對手批肘中面，一度暈厥，被抬離場嗰陣仲要戴氧氣罩，雖然今場有望復出，不過都係唔好旨意佢今場會有佳態幫到軍心散散地嘅「藍月亮」。維拉呢排順到冇朋友，即使過去6次作客曼城球場輸咗5場，但今場應有力全身而退！
賓迪基戴爾夫交到貨

維拉陣中多位球員依家狀態大勇，中場戴爾夫攻守兼備，新星基亞利殊有活力，活動範圍勁大，串連工夫做到足，而王牌前鋒賓迪基更係腳風極順，近4場入咗6球，曼城嘅防守級數又唔算頂級，想守得住唔失波並唔容易。維拉足總盃入到決賽，返到嚟英超就要為護級，今場無論士氣、信心同心態都贏晒曼城，作客有望偷到雞，受讓必捧。