喜鵲個陣殘到雲 卡華焗打守細波

猪拉多纳

被炒領隊次熱卡華麾下嘅「喜鵲」紐卡素，今晚主場迎戰「天鵝」史雲斯。紐卡素雖仍有少許護級壓力，但喺傷兵滿營下主帥卡華都冇晒計，佢哋最大問題係攻力不濟，但好彩史雲斯亦因冇嘢好爭而戰意成疑，加上箭頭巴菲迪比高美斯因傷缺陣，呢場唔慌多波入，斯維寧玩入球細。

（now 631及688周六晚10時直播）

紐卡素年頭有柏杜跳槽水晶宮，孤寒班主艾殊利搵卡華接手純料係貪平貪方便，諗住過渡半季再搵新帥，如此情況球員又點會賣命？踏入2015年，「喜鵲」於14場正式比賽中只嘗兩勝，近期更連輸6場，睇番積分榜，排第14嘅紐卡素比尾3嘅李斯特城多7分，數字上仍未上岸，但陣中傷兵成籮，路蘭度艾朗斯、希達拉、杜密特、迪奧迪等統統唔出得，防中穆沙施素高及前鋒柏比斯施斯續坐波監，後者缺陣更令攻力大減，卡華焗住要守，實行以1分為本。
無欲無求 史雲斯或Hea踢

論實力同狀態，史雲斯係就係略勝一籌，但現時已經畀修咸頓同熱刺甩開9至10分，下屆歐霸入場券唔使點諗，今仗Hea踢唔奇。而且進攻重心巴菲迪比高美斯受傷要抖到5月中，冇咗呢位法國前鋒壓陣影響唔細，況且史雲斯之前6場作客賽事5仗開細，未必咬得入主守嘅紐卡素，今仗唔慌多波入，揀入球細好正路。