足總盃出局賽季玩完 羅渣士頹爆征西

猪拉多纳

呢排利物浦球迷傾得最多嘅話題，肯定係如果羅渣士被炒，想搵季尾確定離開多蒙特嘅熱血教頭高普好呀，定係搵番曾帶領紅軍捧走歐聯嘅賓尼迪斯好呢？其實羅帥無論喺名氣、往績、教波功力都明顯不及呢兩位名帥，利迷唔想再係佢教亦屬正常。利物浦上場足總盃4強反輸畀阿士東維拉，重創士氣，今晚作客讓唔起搶分護級嘅西布朗，捧讓球主勝。

（now 621周六晚10時直播）

面對被炒傳聞，羅渣士勁有自信回應：「我睇唔到有其他人會比我更適合教利物浦，3個月前我係一位戰術天才，所以我唔會自滿。」

有自信係好事，但太過自信就係冇自知之明，足總盃嘅敗仗就見到羅渣士無論喺排陣定臨場調動都進退失據，結果令到謝拉特嘅生日捧盃夢碎，而羅帥更衰到成為上世紀50年代後首位領軍3年都無冠嘅紅軍領隊。盃又冇得捧，超越曼城殺入前4嘅機會亦微乎其微，相信大部分紅軍球員心中都明白，今個賽季已經提早玩完。
西布朗主場 可保唔輸

力壓羅渣士成為上季英超最佳教頭嘅佩尼斯，今年執教西布朗後，成班波表現生猛，近期連輸3場後，上場作客水晶宮終能贏波止血，球隊依家以36分排喺13位，護級未算穩陣，今晚主場對紅軍，科娜睇好佢哋至少可以保住唔輸，受讓值捧！