車仔衝Block踩行油

猪拉多纳

冠軍直路 阿仙奴阻頭阻勢

今晚英超壓軸上演榜首倫敦打吡，由聯賽8連勝嘅次席阿仙奴喺酋長主場火併一哥車路士。目前車路士喺積分榜一枝獨秀，領先阿仙奴10分，呢場堪稱係冠軍路上嘅最後一道路障，定會踩行油強衝過去，將阿仙奴拋離到直情連車尾燈都睇唔到。事實上車仔主帥莫連奴往績食住阿仙奴領隊雲格，今仗仲有得受讓實在太筍，斯維強捧車仔讓球客勝。

（now 621周日晚11時直播）
法比仔倒戈 眾矢之的

由於阿仙奴同車路士屬倫敦死敵，因此前隊長法比加斯去年選擇上「車」，辣着「廠粉」而被視為叛徒，今仗係呢位「二五仔」首度返酋長球場倒戈，肯定畀「廠粉」噓爆。賽前27歲嘅法比仔稱希望冠軍盡快到手，仲話車仔只係5年冇攞英超錦標，但佢就足足等咗27年咁耐。車仔主帥莫連奴亦大玩心理戰，話唔知點解法比仔唔返阿仙奴，只知佢加盟車仔因為有盃落袋，擺明係寸兵工廠唔夠班贏英超。

查實阿仙奴近況勁弗，近8場聯賽贏晒升上第2位，而且陣中只得阿歷士張伯倫、阿迪達及梅迪薩卡有傷在身，幾乎可夫添出擊，雖然現時兩隊相差10分，但領隊雲格聲言未肯放棄，今仗一定要喺主場全力喪攻，希望阻止踩行油嘅車仔直衝終點，不過咁樣好易正中車仔下懷。
莫連奴往績 食住雲格

要知莫連奴靠防守起家，尤其對住強隊一定先求唔輸，對親強敵多用「泊大巴」戰術，今季兩鬥曼聯同曼城，刻意縮後等你嚟攻，最終嗰4場取得1勝3和，包括上周憑一次突擊戰勝同阿仙奴一樣咁弗嘅紅魔鬼，證明呢招萬試萬靈。

加上「寸王」莫連奴正係雲格最大剋星，呢對冤家過去交手12次，莫帥取得7勝5和未輸過嘅佳績，數據堅挺，車仔咁守得，阿仙奴即使強攻都未必咬得入，估計車仔今仗有力全身而退，繼續同兵工廠保持距離，有受讓之利挭係揀讓球客勝。