「風流傻豹」作客送分 帕爾馬夠Pro有回報

猪拉多纳

意甲 21:00（日）30 帕爾馬 Vs 巴勒莫

債台高築嘅帕爾馬，今季兩度易主仍未能拯救球會，上月終於宣布破產，目前正尋求新買家。雖然球員被拖糧，但近期呢班波嘅表現卻值得一讚，完全展現出專業精神，今晚佢哋喺主場迎戰巴勒莫，球員為前途實搏，足智彩冇開讓球盤，受讓嘅1.6倍「讓主」仍值得熱捧。

帕爾馬近5仗取得2勝2和1負，當中以爆冷擊敗榜首祖雲達斯1:0最令人驚喜。查實帕爾馬上半季表現咁差，主要係冇糧出同經常出現人事變動，但自從佢哋3月宣布破產後，一切已成定局，球員反而專心練習同比賽，諗方法「自救」，即使來季散班，都易啲搵番頭好人家先！
卡利亞里晒冷「大」費倫

當然，教練鄧納東尼都應記一功，因為佢肯捱義氣帶住班「孤兒仔」，又呼籲球迷入場打氣支持，依家只要有新買家喺5月6日前注資2,000萬歐元，帕爾馬就算降班，來季仍可以喺乙組征戰，如果唔係就真係散班收場，結局係點都好，預計都會搏埋呢幾場波。對家巴勒莫位處中游，降班唔使愁歐洲賽又冇行，戰意一般，而且佢哋向來靠主場搵食，作客成績平平，今季聯賽僅贏兩場，今鋪讓波堅信唔過。

另一場意甲，費倫天拿主場對卡利亞里（TVB301周一凌晨0:00直播），客軍教練施文數日前請辭，由費斯達接任，但相信邊個教都救唔番隊波，事關尾二嘅卡利亞里落後安全區9分，餘下幾仗肯定盡地一煲喪攻，以該隊條防線咁豆腐，面對入球能力不俗嘅費倫，開1.55倍入球大嘅機會相當高。
樂比推介：帕爾馬（讓主）、費倫（入球大）