曼聯狂鋒襲拖肥襲拖肥

猪拉多纳

為保飯碗搏甩髀

今晚英超上演兩場「紅藍對決」，講到矚目程度，梗係阿仙奴鬥車路士較高，但其實打頭陣嘅愛華頓對曼聯亦唔輸蝕。「紅魔」領隊尹戈爾最近被爆計劃今夏瘋狂增購前鋒，尹佩斯、法卡奧、迪馬利亞等鋒將為保住飯碗，今輪造訪葛迪遜公園球場勢必施展渾身解數，幫「紅魔」贏波搶分鞏固三甲位置，奪取下屆歐聯分組賽入場券，從而博取教頭好感，讓平半1.81倍「上盤」撐得過。

（now621台周日晚8:30直播）

每逢臨近季尾，轉會新聞就會再度活躍，曼聯教頭尹戈爾即使被指陣容「頭重尾輕」，但佢似乎唔打算改變組軍方針，近日被指睇中馬體會箭頭基沙文同西維爾射手卡路士巴卡，喺荷蘭國家隊跟過佢嘅燕豪芬快翼迪比，亦被列作今夏收購目標，而且迪比嘅團隊上周三去咗曼徹斯特同尹戈爾探討轉會可能性，上星期五更喺twitter鋪咗張曼聯訓練中心門口嘅相，睇嚟呢單轉會好快會成事。咁落去尹佩斯、法卡奧同迪馬利亞再唔搏甩髀，夏天執定包袱都得喇。
迪比好事近 前鋒有壓力

「紅魔」上輪雖然作客不敵車路士，但係佢哋踢落極具霸氣，全場㩒住車仔嚟砌，今場對住同屬「藍軍」但實力次一班嘅愛華頓，仲有中堅莊尼伊雲斯停賽6場後強勢復出，相信會攞到唔少甜頭。更何況「紅魔」喺今輪開始前雖然做緊「三哥」，但其實僅領先同市宿敵曼城1分，如果要保住三甲衝過終點，搶得下屆歐聯分組賽資格，根本冇任何失分空間，今場讓平半濕濕碎啦！
愛華頓冇嘢好爭

愛華頓今場除咗吉遜、白賴仁奧維度等原有傷兵，盧卡古、巴克里、米拿拉斯等猛將悉數候命，齋睇陣容唔係冇得踢。但「拖肥糖」依家排喺第12位，爭歐洲賽入場券輪唔到佢哋，又冇降班危機，贏波鬥心隨時打個折扣。再講，佢哋近3場聯賽贏嘅對手只係包艇嘅般尼、狀態低迷嘅紐卡素，同埋近期作客演出走樣嘅修咸頓，今場對住強勢來襲嘅「紅魔」唔似頂得住囉。