侯城搶分唔赦紅軍

猪拉多纳

今晚英超獨腳戲侯城主場對利物浦，「紅軍」喺足總盃出局，上仗英超對西布朗又失2分，全隊波踢到散晒，最大鑊係鋒線腳頭無靈，領隊羅渣士衰到要搵番巴洛迪利擔正，可見情況幾咁惡劣。至於「老虎」侯城急需搶分護級，加上剛打破連續6場不勝困局，士氣提升，頂得住利物浦來犯，侯城受讓要讓球主勝。

（now621周三凌晨2時45分直播）
巴神掛帥鋒線唔掂

利物浦今季成績大倒退，好大程度係因為蘇亞雷斯離隊，史杜列治長期傷多過踢，而呢位射手今場續抖。列基林拔同波連尼又冇料到，估計羅渣士今場又要焗用「巴神」攻堅，恐怕再次令球迷失望。至於原本進攻最有威脅嘅史達寧，自從續約問題「跳草群舞」後愈踢愈衰，似乎係想博離隊。加上隊長謝拉特上仗帶傷比賽，相信無法匆匆再戰，缺少呢位精神領袖，群龍無首下更加谷唔起。
主場出擊往績硬淨

至於侯城仲未擺脫降班旋渦，危機當前反而激發隊員鬥心，上仗力挫水晶宮，為護級打下一支強心針，勢必再接再厲。事實上，「老虎」一向唔怕「紅軍」，首循環作客都能夠打和0比0，而佢哋近3次主場對利物浦，更錄得2勝1和硬淨戰績，更何況對手現時處於弱勢，今仗侯城有分落袋機會甚高，受讓梗係要捧。