車仔搶W話之李

猪拉多纳

差兩步登頂 唔好畀佢停

今晚英超獨腳戲，喺積分榜放到甩轆嘅車路士距離登頂只差兩步（6分），為免夜長夢多，作客尾4嘅李斯特城當然全力搶W。車仔近期喜事重重，唔單止賽和阿仙奴掃除奪標最後障礙，主將夏薩特亦榮膺英格蘭球員先生，主帥莫連奴一向贏波唔嫌悶，撞正連贏4場嘅「狐狸」李斯特城，為咗盡快鎖定重奪失落4季嘅英超冠軍，隨時又啟動「小勝Mode」，1.6倍客勝咪嫌熱。

(now 621周四凌晨2時45分直播)
李斯特城未必去盡

隨住日前與爭標勁敵阿仙奴互交白卷，車仔已領先兵工廠同曼城10分穩居榜首，聯賽剩番5輪，只要攞多6分，便可繼2009至10年度球季後再次稱霸英超。車仔今季表現的確出色，除主將夏薩特啱啱當選英格蘭球員先生外，6名球員入選英格蘭職業足球員聯會最佳陣容，絕對係實力嘅證明。以往車仔好似有錢大晒，經常一擲千金買人，被嘲用錢買冠軍，但今季一反常態，喺轉會市場竟錄得140萬鎊盈餘，如成功登頂，便會成為10年來首支喺轉會市場有錢賺嘅英超冠軍，一洗暴發戶污名，實現名利雙收。

對手李斯特城近況大勇，連贏4場後從包尾跳升至第17位，護級重現希望。不過，「狐狸」之後將會對紐卡素、修咸頓、新特蘭同昆士柏流浪，除咗修咸頓打風流波外，其餘全部係屬護級對手，其中下仗對手紐卡素已連輸7場，頹到冇朋友，與其今仗同車仔硬撼損手爛腳，倒不如避重就輕，唔阻人發達，留番啲力同「喜鵲」等同級對手搏過更實際。
唔怕醜陋最緊要贏

雖然車仔箭頭迪亞高哥斯達好大機會續抖，但上仗因腦震盪入院嘅中場奧斯卡杜斯山度士證實冇大礙可以候命。而守和阿仙奴一役被主隊粉絲高呼「車仔好悶」，主帥莫連奴即寸爆話阿仙奴十年冇攞過英超錦標至係悶喎，為盡快鎖定聯賽冠軍，「寸王」唔介意用醜陋嘅方法贏波。

睇番車仔之前聯賽所贏7仗，全部都係煲魚生粥僅勝一粒，當中不乏對昆士柏流浪、侯城、阿士東維拉等下游分子，今仗作客勁弗嘅「狐狸」，再啟動「小勝Mode」可能性唔低，1.6倍嘅客勝固然可取，如果嫌分頭唔夠吸引，不妨捧埋3.3倍嘅讓球和。
車路士餘下賽程

5月3日 主場Vs水晶宮

5月10日 主場Vs利物浦

5月19日 作客Vs西布朗

5月24日 主場Vs新特蘭