祖記摧花盡早登基

猪拉多纳

祖雲達斯上仗打吡戰大意失荊州輸畀拖連奴，今輪主場對費倫天拿肯定打醒十二分精神。祖記現領先次席拉素14分，若然今場贏波而拉素失分，就可提早5輪成功衞冕，屆時可專注踢歐聯，今場絕對唔會放過「紫百合」。費倫喺聯賽冇作為，隨時放軟手腳，受讓半一都咪制，力捧祖雲達斯上盤。

（TVB 301周四凌晨2時45分直播）

祖雲達斯上仗輸畀「私房菜」拖連奴全因輕敵，將射手泰維斯、中堅基亞連尼放喺後備席，全失3分可謂咎由自取。事實上祖記對住弱隊不時輕敵失分，被薩斯索羅逼和及輸畀帕爾馬就係最佳例子。不過祖記對前列對手極少失準，早前輕鬆贈拉素兩蛋，意盃更作客大勝費倫天拿3球，可見佢哋只要肯出真功夫，國內難逢敵手。更何況以祖雲達斯今季聯賽主場88％勝出率，攞齊3分唔成問題。
費倫重注歐霸更實際

費倫天拿遭受意甲3連敗後，落後第3位羅馬9分，以聯賽前3拎歐聯入場券機會微乎其微，應會將重心放喺嚟緊嘅歐霸盃4強，事關今屆歐霸盃冠軍可以出戰下屆歐聯，所以費倫主攻歐霸盃絕對合情合理。同埋費倫翼鋒穆罕默德沙拿近期狀態滑落，已連續6場食白果，更加難喺祖記身上攞着數。