車仔衝冠踩冧狐狸竇

猪拉多纳

鋼鐵防線後顧無憂

車路士領隊莫連奴向來識得「計數」，上輪英超作客成功守和爭標對手阿仙奴之後，登頂機會高唱入雲，剩餘5輪只要擸多6分就穩奪冠軍。「藍戰士」今晚聯賽快車造訪李斯特城，新鮮出爐嘅球員先生夏薩特攞獎後首戰固然唔能夠失威，而且往績又食住對手，相信「寸王」今鋪會「轉守為攻」，務求盡快搶分提前封王，簡單捧1.6倍客勝。

（now621台周四凌晨2:45直播）

入選英超年度最佳陣容嘅伊雲洛域、泰利及加利卡希爾，周日連同艾斯派古達隨軍造訪酋長球場，整條車路士防線全場作出20次剷斷、19次攔截、41次解圍同埋3次封阻埋門，搞到「Goal手如雲」嘅阿仙奴冇啖好食，呢條星級鋼鐵防線今場對住火力次一級嘅李斯特城，保持不失冇難度。
近7次交手全勝 場場最少入2球

或者大家會擔心，車仔近期大傷「鋒」，今場會唔會咬唔入李斯特城，但其實「魔獸」杜奧巴已經好得八八九九，仲喺上場後備落場搏殺。同「兵工廠」門將奧斯賓拿炒埋一碟嘅奧斯卡杜斯山度士，送院後證實傷勢無礙今場可以披甲，加埋夏薩特加冕球員先生後首場英超肯定盡砌騷哥利，火力依然有保證。

再講吖，車路士自新年英超首戰不敵熱刺後，踢13場聯賽贏9場和4場，狀態弗到漏不特止，佢哋過往亦恰死「狐狸」，近7次對壘全部贏晒，仲要每場最少斬獲兩球，即使「寸王」賽前盛讚「狐狸」係支好球隊又有好球員，所以驚訝佢哋要淪落到護級，但今場要拆「狐狸竇」話咁易啦！
李城「風流對手」3連勝

李斯特城今個月4戰英超全勝，一下子逃離降班區，係勁嘅！但值得留意嘅係，佢哋呢幾場勝仗中，除咗護級大戰鬥般尼較為惡踢，其餘3場對手都係喺中游冇嘢好爭嘅韋斯咸、西布朗同史雲斯，今場遇着搶分封王嘅車路士，莫講話箭頭占美華迪同荷西烏路亞難搵食，佢哋今季失波超過50球，亦唔似頂得住車仔進襲，揀客勝啱數。
盤路解碼：兩軍近5次碰頭開出4次「半場大」。

Data King：李城地頭半場旺開和

‧李斯特城近6仗英超主場開出2次「半主」及4次「半和」。

‧車路士近7次鬥李斯特城每場最少攻入2球。

‧雙方近7次對決，車路士取得全勝。
乜都玩錦囊：捧埋「剋星」車仔半場勝

車路士近7次鬥李斯特城贏晒唔在講，其中5場更喺上半場就省入兩粒，即使「狐狸」近期主場表現硬淨，但今場遇着「剋星」唔似頂得住，一於揀埋2.15倍「半場客勝」。