些路迪成肚火搵登地洩憤

猪拉多纳

今晚免費台有得睇蘇超爭標組獨腳戲，由一哥些路迪主場迎戰登地，些路迪盃賽出局三冠夢碎成肚火，誓要盡快完成聯賽四連冠霸業氹番粉絲，登地今場作客整定冇運行，些路迪讓到二球都要讓球主勝。

（亞視國際台周六凌晨2時45分直播）
三冠夢碎要補鑊

自從格拉斯哥流浪因財困降班後，些路迪喺蘇超就好似丁蟹咁打橫行，就算近年喺歐洲賽成績麻麻，擸晒國內三大錦標已經係「基本消費」。些路迪3月時順利拎咗國內聯賽盃，但上月中蘇足盃4強對恩華尼斯喺門將哥頓被逐、以寡敵眾下激戰120分鐘，加時末段先至失守被踢出局，國內三冠夢幻滅，咁樣輸法梗係谷住度氣，惟有化悲憤為力量，盡快鎖定聯賽冠軍，完成四連冠霸業氹番粉絲。

些路迪依家領先次席鴨巴甸8分形勢大好。喺蘇足盃對恩華尼斯屢失良機嘅箭頭利治格菲斯，上仗作客登地聯大演帽子戲法，重拾射手觸覺。

升班球隊登地經過季初狂搶分後，提早上岸兼殺入前六爭標組行列，已經超額完成，難免有所回落，近8仗贏得兩場可見一斑，中場主將基格史超活今仗更要坐波監，實力受削，撞正爭標心切嘅「綠白兵團」難逃大敗厄運，讓球主勝有買趁早。