利華 拜仁入球騷娛賓

猪拉多纳

塵埃落定 冇嘢好爭

出爐德甲盟主拜仁今晚造訪利華古遜，戲碼係就係勁嘞，不過一隊封咗王，一隊就鎖定咗來屆歐聯參賽資格，老實講真係無關痛癢。拜仁為留力歐聯會盡遣施巴斯坦洛迪同施蘭卻特等新星落場，利華冇壓力亦會放開嚟踢，大家都冇包袱肯定大把波入益球迷，捧1.88倍大啱數！

（有線61、64、201、203及中央5台周日凌晨0:30直播）
拜仁下周作客巴塞

拜仁啱啱喺德國盃4強出局，三冠王美夢幻滅，家陣嘅目標肯定係衝擊歐聯錦標，適逢禮拜四凌晨就要喺4強首回合造訪巴塞，洛賓同羅拔利雲度夫斯基又打埋柴，主帥哥迪奧拿都唔敢再搏，賽前放風話會派遣施蘭卻特、基安盧卡加甸奴、施巴斯坦洛迪同米素爾韋沙等小將落場，傷愈冇耐嘅查維馬天尼斯亦會擔正催谷狀態，咁嘅人腳，唔太信得過喎！

不過咁，主隊利華已經鎖定來屆歐聯參賽資格，嚟緊冇咩好搏，冇包袱落場自然踢得夠放，預計祖利安白蘭特、傑斯寧同孫興民呢個攻擊鐵三角會放開懷抱「騷哥利」，撞正一班爭緊上位嘅拜仁生牯仔，入波邊會少吖？