鳳凰墨城 捱細界！

猪拉多纳

淘汰賽大家做「穩字派」

打工仔有三日長假，頭兩日出去玩完，嚟到最後一日就最啱留喺屋企休息，仲可以睇波過吓癮。今日晏晝澳職季後賽淘汰圈，威靈頓鳳凰主場迎戰墨爾本城，季後賽一戰定生死，兩隊唔想輸波難免踢得保守，而且墨爾本城對上兩場澳職一共失咗7球咁多，今場更加會做好防守工作，科娜捧細盤！

（有線64台周日下午3時直播）

墨爾本城同英超曼城及美職紐約城分屬「姊妹球會」，都係由阿聯酋皇室成員之一嘅文梳亞投資，3支球隊都獲揼本大搞，其中墨爾本城季初更搵過「狂牛射手」韋拿返嚟客串踢幾場，證明幕後都想創一番成績。

不過老套講句，「羅馬非一日建成」，墨爾本城今季戰績唔係好突出，常規賽27戰贏得9場，叫做掹車邊入到季後賽，球隊喺最後兩場常規賽賽事，作客分別畀珀斯光輝同阿德萊德聯大炒1比3同1比4。雖然話大敗可能係因為留力季後賽，不過兩場加埋失夠7粒，防守就點都有啲問題，今場遠征威靈頓，預料「墨城」會先穩穩陣陣搞好條防線，務求搵機會一劍封喉。
鳳凰雙箭死晒火

威靈頓鳳凰最近6次對住墨爾本城都冇優勢，近兩次交戰打和0比0，可見雙方實力差距唔大，嚟到呢場重要嘅季後賽場合，相信即使威靈頓鳳凰主場出戰都唔敢輕舉妄動，費事畀對手偷雞成功。再加上鳳凰兩大射手尼敦般斯同基舒拿近期陷入球荒，其中喺常規賽入咗13球嘅尼敦般斯近5場都冇波入，鳳凰今場想破僵局都幾難。