煞科日撐米爾頓凱恩斯

猪拉多纳

英甲今晚煞科，布里斯托城已穩奪聯賽冠軍及升班資格，普雷斯頓及米爾頓凱恩斯將會爭逐餘下一個直升英冠席位。米爾頓凱恩斯季尾大爆發，對上九場聯賽取得八勝一和，當中四次主場均能淨勝對手兩球或以上，今次對住已經篤定降班嘅伊奧維冇留手，熱捧讓球主勝。

（周日晚7時15分開賽）

排第二嘅普雷斯頓現以一分領先米爾頓凱恩斯，只要今晚作客高車士打全取三分，便毋須理會其他戰果肯定取得第二名，不過主隊高車士打現時排尾三，仍未擺脫降班威脅，為搶分護級戰意唔會差得過普軍，而且普雷斯頓對上五場作客有三次和波，整季聯賽作客得勝率僅僅過五成，今場絕對有失分可能。
主場有力大炒伊奧維

相反米爾頓凱恩斯對手係已經篤定降班嘅包尾大幡伊奧維，無論戰意或實力都贏對手一大截。米爾頓凱恩斯係季尾狀態最佳嘅英甲球隊之一，對上九場聯賽八勝一和，當中四場主場全勝之餘，加埋一共入咗十五球，火力驚人。首席射手基歷治今季所入嘅十九個聯賽入球有十二個喺主場取得，於主場球迷面前表現特別醒神，加上有被選為全季英甲最佳十一人之一嘅中場班迪爾阿利鋪橋搭路，卡爾巴卡、保迪治、丹尼爾包維又交到功課，難怪今季已經攻入九十六球，只要多入四球便可突破百球大關，如果能夠攞埋升班資格當然係完美結局喇，主場出擊相信要贏兩粒問題不大，捧讓球主勝！