ＦＣ北京守細波抗藍翼

猪拉多纳

亞冠盃展開最後一輪分組賽，今日焦點之戰必屬G組，南韓球隊水原藍翼主場對中超球隊F‌C北京（北京國安）。藍翼已獲出線權，而國安攞1分亦可以晉級，「默契和波」論不脛而走。事實上，雙方冇必要贏波，難免放慢比賽節奏，尤其是國安最緊要保不敗，今仗有隊長徐雲龍復出鎮守後防，更加穩陣。相信入波唔會多，首選入球細。（now 670周二下午5時直播）

北京國安原本出線形勢大好，但上輪主場卻輸畀布里斯班獅吼，搞到再現暗湧。不過呢支首都球隊始終有一定級數，後防非常穩陣，5場分組賽只失兩球，5戰全部開細，包括首循環贏水原藍翼1比0。國安只要有心加強防守攞1分，相信藍翼咬佢哋唔入。賽前國安收到好消息，隊長徐雲龍已經傷愈，可以同最佳拍檔趙和靖扼守中路，有利穩定軍心。

至於水原藍翼剛於聯賽，派強陣作客惡鬥完榜首勁旅全北汽車，但卻輸波收場，兼有中場主力金恩善受傷，賠了夫人又折兵，實在打擊士氣。今場亞冠盃對藍翼冇乜意義，留番啖氣，準備淘汰賽階段好過，以免再出現無謂傷兵。
鹿角首爾對攻大戰

H組生死戰，鹿島鹿角主場對F‌C首爾，兩隊現時同分，先計對賽成績情況下，鹿角首循環0比1不敵F‌C首爾，所以今場必須贏波，先至可以出線，鹿角應會主攻。值得留意，如果同組西悉尼流浪者擊敗已獲出線權嘅前屆冠軍F‌C廣州，而鹿角同F‌C首爾打和，兩隊就會一齊出局，所以今場形勢上雙方都冇得縮，推介揀入球大。

（now 670周二晚7時直播）

阿杰